Smågruppe - Møtepunkt A

Smågrupper av kristne er ikkje berre nok eit kristent aktivitetstilbod som skal fylle opp kalenderen din. Det er derimot relasjonar mellom menneske med ulik grad av tru, som ønskjer å kome nærare Jesus og kvarandre. Og slike grupper har vore ein essensiell del av levande kristne fellesskap, frå dei tolv første læresveinane, mellom dei kristne i Romas katakomber og vidare gjennom kyrkjehistoria. Små grupper av “lesarar” kringom i bygdene var utgangspunktet for det som i dag er Normisjon. Og rundt i verda er kristne kyrkjer i vekst kjenneteikna av at det finst mindre grupper som utrustar og prioriterer kvarandre.

Smågrupper kan gi nære fellesskap på ein annan måte enn dei store møta. I ei smågruppe blir du sett og hjelpt vidare i kristenlivet. Det kan òg vere ein god plass å ta dei første stega inn i trua. Vi meiner at eit sunt og levande kristenliv inneber ei form for veksling mellom dei små og dei store fellesskapa. Derfor tenkjer vi på smågrupper som vårt “Møtepunkt A”.

Ta kontakt med smagruppe@motepunktb.no eller med smågruppeansvarleg Andreas Tjomsland på tlf. 90739102 for å kome i kontakt med ei smågruppe som passar for deg!